A Portada publicado por

Begoña Caamaño, na memoria

Begoña Caamaño, na memoria

Como homenaxe a Begoña Caamaño, que sempre estivo disposta a colaborar con Espazo Lectura cando llo requirimos e de quen gardamos un delicioso recordo do seu paso polo club de lectura Sete Vidas, recuperamos o texto conmovedor e vitalista que nos enviou con motivo da Sentada Lectora que celebramos o 22 de abril de 2012.

Lecturas para vivir máis e mellor

Unha sentada lectora é sen dúbida un dos oxímoros máis fermosos que poidan exisistir. Nada como a lectura para non ficar sentadas, á espera, inactivas, adurmiñadas e pasivas. Nada como as lecturas compartidas, reflexivas e insubmisas para combater a vaga de escurantismo, represión e burramia que pretende nos devolver aos tempos escuros.

Ler para sermos libres, para devenir sabias, para facérmonos máis poderosas e invencíbeis. Ler para estar vivas en tempos que nos convocan aos sepulcros da ignorancia. Ler para que as nosas pupilas non se volvan escleróticas, impermeábeis á realidade.

Hoxe, que un cancro me impide estar fisicamente en Gondomar, quero tamén vos comunicar a miña gran descuberta médica: ler como mellor quimioterapia; ler para saber que existen ao meu alcance moitas máis vidas e saberes das que unha enfermidade poida nunca truncar.

Apertas lectoras a todas e todos dende o convencemento de que as lecturas nos fan empáticas, solidarias, plurais, universais… audazmente irreverentes, poliformicamente humanas, fermosamente salvaxes, civilizadamente responsables.

Begoña Caamaño

Facebook Twitter Digg Email

Espazo Lectura

WP Twitter Auto Publish Powered By : XYZScripts.com