A Portada publicado por

Marga Tojo participará no club Daquelas que Len para falar arredor do seu libro «Maternidade fóra de catálogo»

Marga Tojo participará no club Daquelas que Len para falar arredor do seu libro «Maternidade fóra de catálogo»
O sábado 17 de novembro ten lugar a segunda xuntanza do club de lecturas feministas Daquelas que Len. O libro sobre o que se falará nesta ocasión é “Maternidade fóra de catálogo”, da escritora e xornalista Marga Tojo.
A cita é na Casa da Lectura a partir das 12:00 e contaremos coa presenza autora do libro desde o comezo da sesión.
“Maternidade fóra de catálogo” é un ensaio próximo ao xornalismo narrativo. Parte dun relato en primeira persoa, mestura de crueza e humor, que aborda a crianza no contexto da cidade neoliberal. Arrinca no embarazo, onde constata a activación de mecanismos sociais para marcar a entrada nunha nova categoría preconfigurada. Descobre tamén as barreiras e os tabús de ser madrasta. Desenvólvese durante o asentamento en Madrid da autora e da súa filla aos poucos días de nacer. No medio desa experiencia “Maternidade fóra de catálogo” analiza as dificultades, a ausencia de políticas sociais e de axudas para a familia, a imposibilidade de conciliar, a precariedade, as engrenaxes do crecente modelo de explotación laboral coa ficción do emprendemento, a negación sistémica do gozo e da paixón, o cansazo e a pechazón ante a evidencia de novas realidades familiares. Fala tamén esta obra da separación das amigas que non tiveron fillos, da importancia de seguir defendendo esta opción vital e da necesidade de camiñaren xuntas. Detense nas orixes e traxectorias do aleccionamento ás nais, co valente testemuño doutras mulleres, e na demanda dunha nova masculinidade, á cal tamén se lle dá voz. “Maternidade fóra de catálogo” pon fronte a nós o abismo da disgregación co selo do mercado e algunhas opcións para sobrevivir.
No mes de outubro celebrouse a primeira xuntaza do Daquelas que Len. O libro escollido para a estrea foi «Todos teriamos que ser feministas», da autora nixeriana Chimamanda Ngozi Adichie. Estas son as imaxes dese día.

Daquelas que len 2018/10/22

Facebook Twitter Digg Email

Espazo Lectura

WP Twitter Auto Publish Powered By : XYZScripts.com