A Portada publicado por

No outono regresan as actividades de Espazo Lectura

No outono regresan as actividades de Espazo Lectura

En Espazo Lectura xa estamos listos para iniciar unha nova tempada de actividades lectoras. A Xunta Directiva reunirase a mediados de setembro, como é costume, para planificar o novo curso que comezará no mes de outubro e durante o cal manteremos a actual oferta de actividades de carácter estable e destinadas a todos os treitos de idade.

Aínda hai tempo para ler os libros cos que se abrirán, en outubro, as tempadas dos clubs de lectura

Deixámosvos a continuación os títulos cos que inaugaremos o novo curso dos clubs de lectura, xa que aínda tedes tempo de lelos e animarvos a participar:

  • A nova xeira do Sete Vidas comezará coa lectura de O gardián invisible, de Dolores Redondo (Xerais, 2013), un thriller orixinalísimo protagonizado pola inspectora Amaia Salazar onde se mestura a investigación policial e científica co suspense e coa mitoloxía das lendas navarras.
  • O Lecturas Debuxadas estreará tempada por todo o alto. O cómic sobre o que falaremos é Ardalén (El Patito Editorial, 2013), a última e agardada novela gráfica de Miguelanxo Prado, quen estará con nós na biblioteca de Gondomar para falar sobre a súa obra.
  • Para o Lendo Contigo a lectura escollida é A verdadeira historia da mosca da tele, de María Solar (Galaxia). A sesión será o sábado 26 de outubro e contaremos coa presenza da autora, que será a segunda vez que visita este club.

Nas próximas semanas publicaremos información máis detallada todas as actividades.

Facebook Twitter Digg Email

Espazo Lectura