No Sete Vidas, achegarémonos ás mulleres do nazismo da man de Pilar Buela

O martes 4 celebraremos a sesión de maio do club Sete Vidas centrada na lectura da novela da escritora Pilar Buela Ácaros verdes (Sotelo Blanco, 2003). A cita será, coma sempre, a partir das 20.00 horas na Biblioteca Municipal de Gondomar.

Encontro coa autora
A partir das 21.00 horas, a autora Pilar Buela achegarase á biblioteca de Gondomar para falar cos lectores e lectoras de Ácaros verdes sobre esta novela.

O libro
Berlín, 1945. Un feixe de seres humanos atrapados na rede da guerra, debaténdose nos últimos folgos da vida. Eles, homes que decidiron sucumbir vítimas da súa propia loucura; elas, mulleres que compartiron o seu destino voluntariamente: Eva Braun e Magda Goebbels, as donas do nazismo –unha, exhibida como propaganda do réxime; outra, silenciada como un segredo do poder–, dúas vidas distintas e un mesmo destino. Pero, que facían alí?, que buscaban?, que esperaban?, que tortos camiños as conduciran a inmolarse xunto con Hitler e o seu lugartenente?
Ácaros verdes (Premio Manuel Lueiro Rey de Novela Curta no 2003) é unha novela que, dende unha perspectiva radicalmente humana, lanza sobre a historia unha ollada feminina que sublima as barreiras temporais e espaciais.


A autora
Pilar Buela Piedra (Calo-Teo, 1966), licenciada en Filoloxía Hispánica e Galego-Portuguesa, é profesora de Lingua e Literatura Galega no ensino secundario e colabora co ICE da Universidade de Santiago. Dentro da súa especialidade ten publicados diversos traballos de didáctica. Con Ácaros verdes, a súa primeira incursión na literatura, obtivo o Premio Manuel Lueiro Rey de Novela Curta no 2003.


Para ler máis