A Portada publicado por

«O verán sen homes» de Siri Hustvedt, lectura no Sete Vidas de marzo

«O verán sen homes» de Siri Hustvedt, lectura no Sete Vidas de marzo
Na sesión do Sete Vidas de marzo falaremos da novela O verán sen homes, de Siri Hustvedt, editada por Hugin e Munin e traducida por Alejandro Tobar. A actividade é o xoves 2 de marzo ás 20:00 horas, na Biblioteca Municipal de Gondomar, e está aberta ao público que queira participar.
O verán sen homes é unha novela escrita en primeira persoa que aborda con ironía e humor a ruptura dunha relación conxugal, e na que a autora trascende e relativiza o drama proporcionándonos reflexións e informacións sobre a súa personalidade e a súa visión do mundo, abordando diversos aspectos como a vellez, a enfermidade, a bioloxía e a neurociencia, os procesos cognitivos, a puberdade, o desexo…
Agardamos que sexa do voso gusto.
Na sesión do pasado mes comentamos a novela Nordeste, de Daniel Asorey. Esta foi, sen dúbida, unha das sesións máis interesantes do Sete Vidas, tanto pola asistencia á sesión e pola novela en si, que gustou de xeito unánime, como pola presenza do seu autor. Daniel Asorey compartiu con nós (apoiándose en interesante material narrativo e fotográfico que achegou para a ocasión) o seu entusiasmo explicándonos as claves da creación da novela: o porqué do protagonismo feminino; da súa fantasía da Compostela con mar; a intención na construción dun pasado alternativo de Galicia; a relación entre bruxas e escravitude… Parabéns pola novela e grazas.
As imaxes dese día pódense ver aquí: https://goo.gl/photos/MeoFc3UJj9XXHvV39
Facebook Twitter Digg Email

Espazo Lectura