Os mércores da Casa da Lectura

00_Casa da Lectura_cabeceira
Sesións de dinamización lectora
Idades da actividades: nenas e nenos de 3 a 10 anos e familias
Día: Todos os mércores (agás festivos e vacacións escolares)
Hora: apertura: 17:30 h / actividade: 18:00 h
Equipo: Beatriz Pereiro (coordinadora), Rosana Estévez e Bieito Legaspi

Todos os mércores pola tarde realízase na Casa da Lectura unha actividade de dinamización lectora dirixida a nenas e nenos de 3 a 10 anos. Esta actividade, que se creou en maio de 2009, comeza ás 18:00 horas e o horario de apertura é da Casa da Lectura para o préstamo bibliotecario é de 17:30 h a 19:30 horas.

Nas sesións de dinamización lectora trabállase cunha perspectiva diferente á que se ofrece no Contomar (o contacontos semanal que Espazo Lectura organiza na Biblioteca Municipal de Gondomar) xa que o obxectivo é presentar a lectura como unha chave que abre as portas a outras experiencias, coñecementos e aprendizaxes.

Para desenvolver as sesións contamos coa colaboración dun equipo duns 20 voluntarios e voluntarias, coordinados por unha persoa da xunta directiva de Espazo Lectura que se encarga de organizar as quendas, xestionar o material necesario para as sesións e guiar o proxecto co obxectivo de que resulte variado e equilibrado en canto ao tipo de propostas.

As sesións de dinamización permítennos unha inmersión en todos os aspectos do libro e da linguaxe a través do texto e da ilustración, e a experimentación das súas posibilidades sonoras e artísticas, abrindo canles de transferencia dunhas linguaxes a outras.

Tendo sempre como base un ou varios contos ou textos, a peroa ou o equipo de persoas que prepara estas sesións vai establecendo vencellos entre a lectura e outras expresións artísticas de xeito que se ofrezan experiencias e aprendizaxes diferentes. Aínda que as sesións son moi  distintas cada semana, a fórmula que serve como base é semellante: lense algúns contos, textos ou poemas e, a partir desa lectura, propónselles ás familias realizar algunha actividade baseada neles: obradoiros de poesía, xogos de ritmo e rima, teatralización de contos, sesións de lectura e música, de contos e maxia, de contos e números, de contos e medos, de teatro de sombras, de expresión plástica, son exemplos dun variado catálogo de actividades.

Esta actividade semanal complementa a sesión, tamén semanal, do Contomar, contacontos que a asociación Espazo Lectura leva a cabo todos os luns na Biblioteca Municipal de Gondomar, fixando deste xeito unha programación estable que, partindo do sociedade civil, se singulariza pola súa dimensión e especialización.