Sesión especial do Lecturas Debuxadas con Inacio Vilariño e Iván Suárez, autores de “Titoán”

O martes 23 de abril, ás 20:00 horas na Biblioteca de Gondomar, celebramos unha sesión espcial do club de cómic Lecturas Debuxadas dentro da Semana do Libro e a Lectura 2013. Con tal motivo, contaremos coa presenza de Inacio Vilariño e Iván Suárez, guionista e debuxante, respectivamente, de Titoán (Edit. Demo), gañadora do Premio Castelao de Banda Deseñada 2011.

Reproducimos un fragmento do comentario que sobre a obra fixo o crítico literario Armando Requeixo no seu blog.

Titoán, seguindo o fío do relato “Peito de lobo” inserido en Retrincos, parte dunha anécdota autobiográfica vivida polo escritor cando, sendo novo, decidiu facer un cabezudo para as festas de Rianxo imitando a face dun veciño da vila, fisicamente pouco agraciado, ao que todos coñecían polo nome de Titoán, pois participara na Batalla de Tetuán, de onde procedía, por deformación, o seu alcume.

O sonoro enfado que con Castelao agarrou o tal Titoán ao se ver caricaturizado como cabezudo e a posterior reconciliación entre este o xenial intelectual e escritor sérvenlles a Inácio Vilariño e Iván Suárez como esqueleto no que van engastando unha musculación biográfica que avanza e retrocede en prolepses e analepses narrativas, levándonos da man dos anos pontevedreses do rianxeiro, os comezos como caricaturista na prensa galega e madrileña, o compromiso anticaciquil das súas colaboracións no semanario local El Barbero Municipal e mesmo o seu casamento coa estradense Virxinia Pereira, entre outros feitos relevantes na conformación da súa personalidade polo tempo no que estaba a definirse a súa formación política e literaria.

A suxestión tremelecente do trazo de Iván Suárez, o seu dominio do tintado e da economía expresivo-visual maridan idealmente coa capacidade para a narración elíptica e a condensación textual de Inácio Vilariño, logrando entrambos facer boa aquí a máxima de que o menos é máis.

Tod@s @s devot@s seguidor@s da figura senlleira de Castelao teñen neste Titoán unha cita obrigada. E non lles ha pesar, pois poucas veces discurso tan gorentoso se veu acompañado de plasmación ilustrada tan apetecible. ¡Abofé!

1107_titoan

 

Estas son imaxes tomadas na sesión de abril, cando lemos Pagando por ello.