A Portada publicado por

«Un mapa do lar», da escritora norteamericana Randa Jarrar, no Sete Vidas de abril

«Un mapa do lar», da escritora norteamericana Randa Jarrar, no Sete Vidas de abril

A lectura do mes de marzo permitiunos viaxar da man de Marcos Calveiro e a súa novela, Fontán, ao século XIX e descubrir o impresionante traballo que este ilustrado galego semi-descoñecido levou a cabo para, por primeira vez, facer o deseño do mapa de Galicia tal e como hoxe o coñecemos, coas súas exactas medidas e proporcións.

Non foi premeditado, pero o azar quixo que a proposta do Club de Lectura Sete Vidas, que se reunirá o martes 5 de abril ás 20:00 horas na Biblioteca de Gondomar, tamén trate dun mapa, este desgraciadamente máis impreciso, variable e usurpado: falamos de Un mapa do lar, da escritora Randa Jarrar, nada nos EEUU, filla dun palestino e unha greco-exipcia.

Un mapa do lar dá conta, mediante a narración en primeira persoa, da vida dunha cativa marcada pola ocupación de Kuwait, escenario ao que se engade o campo de batalla doméstico. Nesta realidade plural, o lar sempre ausente é Palestina, a patria que Nidali albisca a partir dos mapas, das historias e das anécdotas dos avós, e que configura unha identidade arrebatada e marcada pola migración. A voz narrativa medra consonte a protagonista queima as etapas: a inxenuidade dos seus primeiros pasos no Golfo Pérsico, as implicacións de deixar atrás unha vida, co traslado a través de Iraq e Xordania a Exipto, onde cómpre comezar de novo, e a adolescente rebelde, xa en Texas, que pelexa pola súa independencia e a construción dunha identidade de seu fronte ás imposicións dun pai violento que pretende dirixir o seu destino.
Alén das particularidades xeográficas e culturais —perceptibles no texto a través da inclusión de termos árabes—, a historia aborda, con humor e ironía, temas universais: as consecuencias da guerra, o espertar da sexualidade, as relacións familiares ou a entrada na madureza.

Deixamos aquí as imaxes da sesión que compartimos co escritor Marcos Calveiro, da que falabamos antes:

Facebook Twitter Digg Email

Espazo Lectura